حالیہ بارشوں سے حویلیاں ایوب پل کو شدید نقصان، ٹریفک مکمل بند

حویلیاں (پریس کلب رپورٹ) — ہزارہ ڈویژن میں حالیہ سیلابی بارشوں نے شدید تباہی مچائی، جس کے نتیجے میں حویلیاں ایوب پل سمیت متعدد مقامات پر کروڑوں روپے کے نقصانات رپورٹ ہوئے ہیں۔

صدر تحصیل بار ایسوسی ایشن حویلیاں عبدالر حیم خان ایڈوکیٹ نے کہا ہے کہ ایوب پل سرکنے کے باعث انتظامیہ نے ہر قسم کی ٹریفک کے لیے پل کو مکمل طور پر بند کر دیا ہے، جس سے ہزاروں شہریوں کو شدید مشکلات کا سامنا ہے۔

انھوں نے این ایچ اے حکام سے مطالبہ کیا ہے کہ عوامی مشکلات کے پیش نظر اس اہم شاہراہِ ریشم کے پل کو ہنگامی بنیادوں پر مرمت کر کے فوری طور پر آمد و رفت کے قابل بنایا جائے۔

عبدالر حیم خان ایڈوکیٹ نے منتخب عوامی نمائندوں پر بھی زور دیا ہے کہ وہ عوام کے ساتھ کھڑے ہوں اور اس سنگین عوامی مسئلے کے فوری حل کے لیے اقدامات کریں۔