دبئی: سعودی وزارت حج و عمرہ نے خلیج تعاون کونسل (GCC) کے شہریوں کے لیے بڑی خوشخبری دیتے ہوئے اعلان کیا ہے کہ وہ اب سال کے کسی بھی وقت عمرہ کی ادائیگی کر سکتے ہیں۔ ان افراد کو مملکت میں داخلے کی اجازت تمام زمینی، فضائی اور سمندری راستوں سے دی جائے گی۔
وزارت کے مطابق، عمرہ کے اجازت نامے بآسانی سرکاری ایپلی کیشن “نسک” کے ذریعے حاصل کیے جا سکتے ہیں۔ یہ اقدام حجاج کے لیے سہولیات کو بہتر بنانے اور عمرہ کے انتظامی طریقہ کار کو مزید آسان بنانے کی کوششوں کا حصہ ہے۔
نئی پالیسی کے تحت GCC ممالک کے نہ صرف شہری بلکہ ان ممالک میں رہائش پذیر غیر ملکی افراد بھی مختلف اقسام کے ویزوں پر عمرہ کی ادائیگی کر سکتے ہیں۔ ان ویزوں میں “نسک” پلیٹ فارم سے جاری کردہ عمرہ ویزے، سعودی ایئرلائن اور فلائی ناس کے ذریعے فراہم کردہ ٹرانزٹ ویزے، اور وزارت خارجہ کے پورٹل “ksavisa.sa” کے تحت جاری کردہ سیاحتی ویزے شامل ہیں۔
تمام عمرہ زائرین، خواہ وہ مقامی ہوں یا بیرون ملک سے آنے والے، کے لیے ضروری ہوگا کہ وہ مسجد نبوی کے مقدس مقام، روضہ شریف، میں نماز یا زیارت کے لیے “نسک” ایپ سے پیشگی اجازت حاصل کریں۔
واضح رہے کہ سعودی عرب نے 10 جون سے بین الاقوامی عمرہ زائرین کے لیے ویزے کا اجرا دوبارہ شروع کر دیا تھا، اور 11 جون سے نسک پلیٹ فارم کے ذریعے اجازت نامے جاری کیے جا رہے ہیں۔
وزارت حج و عمرہ کے مطابق، عمرہ سیزن کے دوران انتظامات کو بہتر بنانے کے لیے بیرونی ایجنٹس کی رجسٹریشن کی درخواستوں کی وصولی کو محدود کر دیا جائے گا، اور عمرہ کمپنیوں کے ساتھ معاہدوں کی منظوری آئندہ سال شعبان کی پہلی تاریخ سے شروع کی جائے گی۔
مزید برآں، وزارت نے عمرہ کے ویزوں اور داخلے کے لیے اہم تاریخیں بھی جاری کی ہیں: شوال کی پہلی تاریخ عمرہ ویزے کے اجرا کی آخری تاریخ ہوگی، شوال کی 15 تاریخ عمرہ زائرین کے مملکت میں داخلے کی آخری تاریخ ہوگی، جبکہ ذوالقعدہ کی پہلی تاریخ سعودی عرب سے روانگی کی حتمی تاریخ ہو گی۔
About The Author
