ایبٹ آباد: ساتویں محرم الحرام کا مرکزی جلوس شوکت شاہ کے گھر سے برآمد ہو کر روایتی راستوں سے گزرتا ہوا مرکزی امام بارگاہ میں پُرامن طور پر اختتام پذیر ہو گیا۔ جلوس کے دوران سیکیورٹی کے فول پروف انتظامات کیے گئے، جن کی نگرانی خود ضلعی پولیس سربراہ عمر طفیل PSP نے کی۔
سیکیورٹی کے سخت انتظامات
جلوس کی حفاظت پر 1000 سے زائد پولیس افسران اور اہلکار تعینات رہے۔ تمام داخلی و خارجی راستوں پر سخت چیکنگ کی گئی جبکہ واک تھرو گیٹس، میٹل ڈیٹیکٹرز اور CCTV کیمروں کے ذریعے مانیٹرنگ کا جامع نظام فعال رہا۔ ایلیٹ فورس، لیڈیز پولیس، بم ڈسپوزل اسکواڈ اور کوئیک رسپانس فورس (QRF) مکمل طور پر الرٹ رہی۔
ٹریفک پلان اور روانی کا مؤثر انتظام
ٹریفک کی روانی کو برقرار رکھنے کے لیے ایس پی ٹریفک قمر حیات خان کی سربراہی میں خصوصی ٹریفک پلان نافذ کیا گیا، جس کے تحت متبادل راستے فراہم کیے گئے اور ٹریفک کو مؤثر طریقے سے کنٹرول کیا گیا۔
ڈی پی او کا اظہار اطمینان اور شکریہ
ڈسٹرکٹ پولیس آفیسر (ڈی پی او) عمر طفیل نے جلوس کے پُرامن انعقاد پر اطمینان کا اظہار کرتے ہوئے کہا:
“یہ کامیابی ایبٹ آباد پولیس، جلوس منتظمین، رضاکاروں اور عوام کے باہمی تعاون کا نتیجہ ہے۔ ہم سب نے مل کر امن، بھائی چارے اور مذہبی ہم آہنگی کی بہترین مثال قائم کی ہے۔”
انہوں نے پولیس افسران و جوانوں کی پیشہ ورانہ خدمات کو سراہا اور عوام الناس کا تعاون پر شکریہ ادا کیا۔
ایبٹ آباد پولیس کا عزم
ایبٹ آباد پولیس شہریوں کے جان و مال کے تحفظ اور پائیدار امن کے قیام کے لیے آئندہ بھی اپنی ذمہ داریاں بھرپور انداز میں ادا کرتی رہے گی
About The Author
